Qo‘shko‘pir tumani "Inson" ixtisoslashtirilgan kompleks markazining huquqiy masalalarda ekspert maslahatchi bosh mutaxassisi Sh.S. Qurbonboyev hamda Ijtimoiy to‘lovlar shoʻbasi mudiri D. Sa’dullayev Ayronko‘l mahallasi aholisiga "Huquqiy maslahat" kunini o‘tkazdilar. Tadbir davomida fuqarolarga ijtimoiy himoya, ularning huquqlari hamda davlat tomonidan ko‘rsatilayotgan huquqiy va ijtimoiy yordam masalalari bo‘yicha tushuntirish berildi.

Tadbirda markaz huquqshunosi Sh.S. Qurbonboyev aholining ijtimoiy himoyasini ta’minlash, bolalar huquqlari va qonuniy manfaatlarini himoya qilish bo‘yicha amalga oshirilayotgan ishlar haqida ma’lumot berdi. Shuningdek, tazyiq va zo‘ravonlikka uchragan xotin-qizlar hamda ularning voyaga yetmagan farzandlari, shuningdek, og‘ir ahvolga tushib qolgan fuqarolarning manfaatlarini himoya qilish maqsadida sudlarga kiritiladigan ariza, shikoyat va da’volar O‘zbekiston Respublikasi qonunchiligiga muvofiq qanday tartibda rasmiylashtirilishi haqida tushuntirish berdi. Xususan, 2024-yil 18-oktabrdagi 977-sonli Qonunga muvofiq, ushbu toifadagi fuqarolar davlat bojidan ozod etilishi belgilanganini qayd etdi.

Shu bilan birga, markazning Ijtimoiy to‘lovlar sho‘basi mudiri D. Sa’dullayev aholiga ijtimoiy nafaqalar va yordam turlari bo‘yicha ma’lumot berdi. U O‘zbekiston Respublikasi Vazirlar Mahkamasining 2023-yil 23-martdagi 119-sonli Qaroriga muvofiq, ijtimoiy himoyaga muhtoj fuqarolarga nafaqa tayinlash tartibi haqida tushuntirish berdi. Shuningdek, 2021-yil 21-oktabrdagi 654-sonli Qaror asosida ishlab chiqilgan "Ijtimoiy himoya yagona reyestri" axborot tizimi va 2024-yil 18-iyulda joriy etilgan "Ijtimoiy qarta" axborot tizimining imkoniyatlari haqida batafsil ma’lumot taqdim etdi.

Tadbir davomida fuqarolar o‘zlarini qiziqtirgan savollarga javob oldilar. Ushbu tadbir aholining huquqiy ongini oshirish va davlat tomonidan taqdim etilayotgan imtiyozlardan to‘g‘ri foydalanishiga ko‘maklashish maqsadida tashkil etildi.

Постни тарқатинг: