Коронавирус пандемияси карантини даврида коммунал соҳа корхоналаридан дезинфекция, санитар-гигиена тадбирларига эътиборни кучайтириш талаб этилади. Зеро, мазкур соҳа ходимлари касб тақозосига кўра  хонадонма-хонадон юришларига, аҳоли билан кўп мулоқот қилишларига тўғри келади. “Ҳудудгаз Хоразм” масъулияти чекланган жамиятига қарашли барча корхоналарда ҳам ходимлар учун  коронавирус инфекциясидан сақланишни таъминловчи барча шароитлар яратилган. Хусусан, жамиятнинг Қўшкўпир туман газ филиалида ҳам маъмурий бино ҳар ҳафтада дезинфекция қилинмоқда, барча хоналар эшиклари тутқичларига дока ўраб қўйилган бўлиб кунига бир-неча марта дезинфекция эритмаси билан намлаб турилади. Қўл ювиш жойларида совун, қоғоз салфеткалар муҳайё. Барча ишчилар тиббий ниқоб ва қўлқоп, нам салфеткалар билан бепул таъминланган.

      Айниқса, суюлтирилган газ  балонлари ва уларни ташувчи махсус автомобилларни дезинфекция қилишга эътибор кучайтирилган. Чунки, Қўшкўпир туманида табиий газ етиб бориши қийин бўлган ҳудуддда жойлашганлиги  сабабли суюлтирилган газ истеъмолчиси ҳисобланади ва уларга суюлтирилган газ айланма усулда етказиб берилиши боис уйма-уй тарқатилар экан бўш газ балонлари тўлдирилганига алмаштириб берилади. Агар коронавируснинг темир юзада узоқ сақланишини ҳисобга олсак газ балонларини дезинфекция қилишнинг нечоғлик муҳим эканлигини англаш қийин эмас.

      Шу ўринда туманда аҳолини суюлтирилган газ билан таъминлаш бўйича жорий  йилнинг 1-чораги режаси 112 фойизга бажарилгани, яъни хонадонларга 363 тонна ўрнига 407 тоннадан зиёд  суюлтирилган газ етказиб берилганлигини таъкидлаш жоиз.

       Тумандаги Ўрта қишлоқ маҳалласида бўлганимизда суюлтирилган газ таъминотидан қай даражада қониқиш ҳосил қилаётганликларини билиш учун маҳалла аҳлини суҳбатга тортдик.

      -Баллонли газ уйимизга ўз вақтида келиб турибди, -дейди Бедил кўчаси 83-уйда  яшовчи  Анвар Жуманиёзов. - Ҳамма коронавирус юқтириб олишдан қўрқиб кўчага чиқмай уйида ўтирган пайтда Қўшкўпир туман газ филиали ишчилари маҳаллама-маҳалла, уйма-уй юриб аҳолига суюлтирилган газ етказиб бермоқдалар. Улардан  жуда миннатдормиз.

        Хулоса ўрнида, Қўшкўпир туманида аҳолига суюлтирилган газ коронавирус пандемияси  карантини  санитария  қоидаларига риоя этилган ҳолда  талаб даражасида  етказиб берилмоқда.

Постни тарқатинг: