1-октябрь – Ўқитувчи ва мураббийлар куни
1-октябрь – “Ўқитувчи ва мураббийлар куни”
КАСБ БАЙРАМИНГИЗ ҚУТЛУҒ БЎЛСИН, АЗИЗ УСТОЗЛАР!
Қўшкўпир туманида 1 октябрь – “Ўқитувчи ва мураббийлар куни” муносабати билан байрам тадбири бўлиб ўтди. Тадбирда туман ҳокими Жўрабек Раҳимов иштирок этиб, байрамга таклиф этилган энг фаол, фидоий, ташаббускор ўқитувчи ва мураббийларни, соҳа вакилларининг фахрий инсонларини, мўътабар, азиз устозларни касб байрамлари билан самимий табриклади ва уларга илм-фан, таълим-тарбия соҳасида фидокорона хизмат қилаётганликлари учун “Ташаккурнома” ва эсдалик совғалари топширди.
Тадбир давомида элимиз суйган хушовоз хонандалар томонидан янграган куй-қўшиқлар, дилхуш наволар барчани даврага рақсга чорлади. Энг эътиборлиси, устозларнинг юз-у кўзларида акс этаётган самимий табассум, қувонч ва шодлик тадбирга янада завқ, кўтаринки кайфият бағишлаганини кўриш мумкин.
Ҳа, ҳақиқатдан ҳам, ўқитувчи – дунёдаги энг эъзозли, эҳтиром ва эътиборга лойиқ, қалбларга яхшилик, эзгулик, комиллик олиб кирувчи мўътабар зотдир. Устозларимиз ёшларга илм, билим бериш билан бир қаторда баркамоллик сари етаклайдилар. Устоз ҳар бир инсоннинг келажаги учун тамал тошини қўйишда муҳим роль ўйнайди. Ҳар биримиз қайси соҳада меҳнат қилмайлик, устоз ва мураббийларга эҳтиёж сезамиз.
Келажагимиз пойдевори, бунёдкорлари! Ёшларимизга билим ва зиё нурини таратишдан асло чарчаманг!
Касб байрамингиз муборак бўлсин, азиз устозлар!
ҚЎШКЎПИР ТУМАНИ ҲОКИМЛИГИ АХБОРОТ ХИЗМАТИ
