КЕКСАЛАР ҲАФТАЛИГИ

Октябрь 09, 2022

3-9-октябрь кунлари “Кексаларни эъзозлаш, уларга ҳурмат-эҳтиром кўрсатиш — халқимизга хос эзгу фазилат” ғояси остида туманимизнинг барча ҳудудларида “Кексалар ҳафталиги” ўтказилиши режалаштирилган эди.

Хонадонларимиз файзи ва барчамизнинг ҳаётимизда катта ўрин тутувчи кексаларга ҳурмат кўрсатиш, уларга ҳар томонлама кўмак бериш, шунингдек, уларнинг жамиятдаги ижтимоий фаоллигини янада оширишга қаратилган ушбу ҳафталик доирасида жойларда қатор маънавий-маърифий, спорт, ободонлаштириш ва хайрия тадбирлари ўтказилди.

Бугун Ўзбекистон ёшлар иттифоқи Қўшкўпир туман Кенгаши раиси Манзура Хўжаева ва туман Сардорлар Кенгаши аъзолари фаҳрий устозлардан бири Бектурди ака Собиров хонадонига бориб, устоз билан дилдан суҳбатлашишди.

Бектурди Собиров - Республикада хизмат кўрсатган халқ таълими ходими, Халқ таълими аълочисидир.

Фаолиятини ўқитувчиликдан бошлаган. Бир қанча масъулиятли лавозимларда фаолият юритган.30 йил давомида Қўшкўпир туман Халқ таълими бўлими мудири ва 15 йил давомида 1-сон ихтисослаштирилган мактаб-интернатида директор лавозимида ишлаган.

Кўп йиллар давомида катта ва масъулиятли лавозимда ишлаш, катта обрў - эътиборга эга бўлиш бахтига муяссар бўлган Бектурди ака таълим тизимига кўплаб янгиликлар олиб кирди. Туманда илғор иш тажрибаларини ўрганиш ва оммалаштириш, кадрлар салоҳиятини талаб даражасига кўтариш вазифаларини амалга оширишни ўзининг асосий вазифаларидан деб билган.

1-сонли ихтисослаштирилган мактаб - интернатидаги раҳбарлик фаолиятида ҳам мактаб - интернат ўқувчилари ҳар йили анъанавий тарзда ўтказилиб келинаётган фан олимпиадалари, кўрик- танловларда биринчиликни қўлдан бермай келишган.

Фидойи устоз Бектурди ака Собиров ёшларнинг фахрли мураббийси, эл-юрт қалбидан жой олган кўнгли тоза, олийжаноб инсон, пиру бадавлат хонадон соҳиби, таълим соҳасининг фидойисидир.

Бугунги кунда фахрли устозимиз туман Халқ таълими бўлимида Фахрийлар Кенгаши раиси вазифасида фаолият юритиб келмоқда.