RASMIY MUNOSABAT.Durdona mahallasi qarovsiz qoldi sarlavhasi ostidagi murojaatga bildirildi
Ijtimoiy tarmoqlarda Qo‘shko‘pir tumani Durdona mahallasi qarovsiz qoldi sarlavhasi ostida tanqidiy murojaat bildirilgan.
Murojaatda bildirilgan gaz, yo‘l, tomorqa yeri olish masalasi, yo‘l belgilari bo‘yicha bildirilgan murojaatlar tegishli tashkilot rahbarlari hamkorligida o‘rganib chiqildi.
O‘rganishlar davomida quyidagilarni ma'lum qilamiz:
Tuman yo‘llardan foydalanish korxonasi davlat muassasasining bergan ma'lumotiga ko‘ra, ijtimoiy tarmoqda ko‘rsatilgan yo‘l korxona balansidagi 4k 986 a "Qo‘shko‘pir k. ga shahobcha" mahalliy ahamiyatdagi avtomabil yo‘li bo‘lib, yo‘lning ta'mirtalab qismi 10 km masofani tashkil etadi.
Ushbu yo‘lni ta'mirlash ishlari O‘zbekiston Respublikasi Prezidentining 2023 yil 10 oktyabrdagi PQ-330-sonli “Yo‘l xo‘jaligi sohasini yanada takomillashtirish chora-tadbirlari to‘g‘risida”gi qaroriga muvofiq “Xalqaro moliya institutlari va xorijiy hukumat moliya tashkilotlari hamda boshqa kredit muassasalari mablag‘lari hisobiga avtomobil yo‘llarini qurish, rekonstruksiya qilish va ta'mirlash” bo‘yicha amalga oshiriladigan loyihalar ro‘yxatiga kiritilgan bo‘lib, yo‘lni ta'mirlash va zamonaviy yo‘l belgilari bilan jixozlash ishlari dastur asosida moliyalashtirilganidan keyin amalga oshirilishini bildiramiz.
Shuningdek, fuqaroning Durdona mahallasidagi ayrim ko‘chalarning tabiiy gaz tarmog‘idan ajratilganligi va yangidan tabiiy gaz tarmog‘iga ulanishda amaliy yordam so‘rab qilgan murojaati ham o‘rganildi.
Bunga asosan, ”Xududgaz Xorazm” gaz ta'minoti filiali, Qo‘shko‘pirtumangaz gaz ta'minoti bo‘limi bergan ma'lumotiga ko‘ra, ushbu hudud O‘zbekiston Respublikasi Vazirlar Mahkamasining 2013-yil 5-iyuldagi “Xorazm viloyati tashkilotlari va aholisini yoqilg‘i-energetikasi bilan barqaror ta'minlash tizimini takomillashtirish hamda uni Respublikaning boshqa hududlarida joriy etish, tabiiy gazdan oqilona va samarali foydalanilishini ta'minlash, iste'mol qilinayotgan energetika resuslari tarkibini iste'molchilarni (briketlangan ko‘mirdan) maishiy gaz ballonlardagi suyultirilgan gazdan foydalanish to‘g‘risida”gi №193-sonli qaroriga asosan tabiiy gaz tarmog‘idan ajratilgan bo‘lib, yoqilg‘ining boshqa turidan foydalanishga moslashtirilgan hududligi ma'lum bo‘ldi.
Xozirgi kunda, aholi xonadonlariga suyultirilgan gaz imtiyozli ravishda arzon narxlarda uzluksiz yetkazib berilmoqda.
O‘zbekiston Respublikasi Vazirlar Mahkamasining 2018-yil 10-avgust kungi “Aholi va ijtimoiy soha ob'ektlariga kundalik hayotda foydalanish uchun suyultirilgan uglevodorod gazini yetkazib berish tizimini takomillashtirish to‘g‘risida” gi № 646-sonli qaroriga asosan har kunda to‘ldirilib almashtirib berish yuzasidan “Hududgaz Xorazm” gaz ta'minoti filiali Qo‘shko‘pirtumangaz gaz taminoti bo‘limida reja grafiklari mavjud.
Aholiga suyultirilgan gazni sotishda O‘zbekiston Respublikasi Vazirlar Mahkamasining № 633-sonli qaroriga asosan narxlarning barqarorligi nazorat qilish ta'minlangan.
Murojaatchining tomorqa yer masalasida qilgan murojaatiga asosan, tomorqa yer ajratish masalasi Prezidentimizning 2021 yil 23 noyabrdagi PQ-20-sonli qaroriga muvofiq dehqon xoʼjaliklari yuritish uchun moʼljallangan yer maydonlaridan “E-AUKSION” elektron savdo platformasi orqali ixtiyoriy ravishda yer maydoniga ega bo‘lishlarini bildiramiz.
QO‘SHKO‘PIR TUMANI HOKIMLIGI AXBOROT XIZMATI
